ក្រោយពាក្យចចាមអារ៉ាមតារាចម្រៀង ខេមរៈ សិរីមន្ត ចប់កុងត្រាផលិតកម្មសាន់ដេ ចេញទៅបើកផលិតកម្មផ្ទាល់ខ្លួន ប៉ុន្តែផ្ទុយពីព័ត៌មានល្បីរន្ទឺនោះ វត្តមានកំពូលតារាចម្រៀងរូបនេះបែរជាលេចវត្តមានផ្លូវការនៅផលិតកម្មហង្សមាស។ ប៉ុន្តែចុងក្រោយនេះក៏ត្រូវបានលេចធ្លាយថា វត្តមាន សិរីមន្ត ចូលហង្សមាសគ្រាន់ជាវេលាចម្លងពេលគេចពីកិច្ចសន្យាពីផលិតកម្មចាស់តែប៉ុណ្ណោះទេ។
ដំណើរវេចបង្វេចជញ្ជូនទាំងបងប្រុសជាអ្នកនិពន្ធមកជ្រកក្រោមដំបូលផលិតកម្មហង្សមាស របស់តារាចម្រៀង ខេមរៈ សិរីមន្ត ក៏ផ្ទុះការគាំទ្រយ៉ាងកក្រើកភ្លាមៗផងដែរ អំពីបទចម្រៀងបើកក្បាលដំបូងនៅផលិតកម្មថ្មី ជាមួយបទ «ស្ទឹងត្រែងបងអើយ» ដែលត្រូវបានមជ្ឈដ្ឋានជាច្រើនលើកឡើងថា ការចេញបទចម្រៀង ខេមរៈ សិរីមន្ត ព្រមនឹងស្ថានការណ៍យោធា នៅទឹកដីខេត្តនោះផ្ទុះភាពតានតឹងជាមួយយោធាឡាវ។ ព្រមគ្នានោះក៏មានមតិជាច្រើន លើកឡើងដែរថា ប្រជាប្រិយភាព សិរីមន្ត អាចពិបាកនឹងប្រជែងអ្នកចាស់ផលិតកម្មមួយនេះ ព្រោះថាពួកគេសុទ្ធជាអ្នកល្បីខ្លាំងដែរ»។
វត្តមាន តារាចម្រៀង ខេមរៈ សិរីមន្ត មកផលិតកម្មហង្សមាសនៅមិនទាន់បានមួយខែនោះ ក្រៅពីផ្ទុះការចាប់អារម្មណ៍នឹងដំណើរចាកចេញពីសាន់ដេមកចូលហង្សមាសជាផ្លូវការនោះ បែរជាផ្ទុះនូវពាក្យលេចឮដ៏ភ្ញាក់ផ្អើល ថា វត្តមាន សិរីមន្ត មកចូលហង្សមាសក៏មិនមានកុងត្រានោះទេ។
ប្រភពពីអ្នកសិល្បៈបង្ហើបថា៖ «ខេមរៈ សិរីមន្ត ដែលធ្លាប់ បែកធ្លាយរឿងចង់បង្កើតផលិតកម្មខ្លួនឯងផ្ទាល់ ពេលចប់កុងត្រាជាមួយនឹងផលិតកម្ម សាន់ដេនោះ ស្រាប់តែលេចមុខនៅផលិតកម្ម ហង្សមាសវិញ។ នោះគ្រាន់តែជាការច្រៀងបណ្តែតប៉ុណ្ណោះ គឺគ្មានកុងត្រាស្អីជាមួយផលិតកម្មហង្សមាសឡើយ មិនខុសពី សុគន្ធ នីសា ដែល ច្រៀងនៅផលិតកម្មថោនមុននោះទេ គ្មានកុងត្រាដូចគ្នា»។
ទាក់ទិនជាមួយមូលហេតុនេះ ត្រូវបានគេលើកឡើងថា ខេមរៈ សិរីមន្ត គ្មានបំណងចូលច្រៀងក្នុងផលិតកម្មណាមួយឡើយ។ លោកមានគោលដៅតែមួយគត់គឺបើក ផលិតកម្មខ្លួនឯង តែដោយសារកុងត្រាជាមួយផលិតកម្មសាន់ដេមានចងលក្ខខណ្ឌត្រង់ចំណុច ដែលមិនអាចឲ្យអ្នកចម្រៀងចេញពីសាន់ដេភ្លាម ទៅបើកផលិតកម្មភ្លាម ទើបលោកសម្រេចចិត្តចូលហង្សមាសតែម្តង។
ទាក់ទិននឹងការទម្លាយភាពអាថ៌កំបាំង ក្រោយដំណើរវេចបង្វេចចូលហង្សមាសរបស់ត្រកូល ខេមរៈ នោះ លោក ខេមរៈ ភិរុណ មិនបានបង្ហាញជំហរបដិសេធ ឬក៏ប្រតិកម្មការទម្លាយព័ត៌មាននោះទេ ខណៈដែលបងប្រុសកំពូលតារាចម្រៀងចំណូលថ្មីនៅផលិតកម្មហង្សមាស រូបនេះ ទទូចប្រាប់ ភ្នំពេញ ប៉ុស្តិ៍ ថា៖ «ជុំវិញរឿងនេះ មិនអាចបកស្រាយបានទេ ព្រោះវាជារឿងសម្ងាត់»។
លោក ភិរុណ ក៏មិនបង្ហាញផងដែរ ពីដំណើរលោក សិរីមន្ត នឹងត្រៀមចេញដំណើរទៅសម្តែងនៅទឹកដីអាមេរិកឆាប់ៗនេះដែរ ដោយលោកប្រាប់ថា៖ «ដំណើរនេះមិនមែនទើបតែហង្សមាសរៀបឲ្យថ្មីៗនេះទេ ដំណើរនេះពួកយើងបានត្រៀមរៀបចំយូរហើយ ហើយពេលនេះក៏មិនទាន់កំណត់ថ្ងៃច្បាស់នោះទេ»។
តាមដំណឹង ខេមរៈ សិរីមន្តនិងលោក ខេរមៈ ភិរុណ នឹងទៅសម្តែងនៅអាមេរិកនៅដើមខែ ៩ ដោយមានតារាទ្រនំ ហង្សមាស សុខ សីឡាលីន រួមដំណើរផងដែរ៕
Comments
Post a Comment