កុំថាឡើយទូរស័ព្ទ iPhone ដែលធ្វើឲ្យមនុស្សជាច្រើនខំប្រឹងដេញស៊េរី សូម្បីតែរបស់ប្រើប្រាស់រូបរាងដូចស្មាតហ្វូនរបស់ Apple នេះ គ្រាន់តែបានឃើញភ្លាម ក៏ទទូចចង់កុម្ម៉ង់ទិញភ្លែត។ ដូចជាតុមួយតម្លៃ ១៧០ ដុល្លារ ជាផលិតផលនាំចូលមកពីប្រទេសចិនដូចក្នុងរូបភាពនេះអ៊ីចឹង។
ស្ថិតនៅលើវិថីព្រះសុធារស ក្បែរផ្សារទំនើបអ៊ីអន ហាងលក់គ្រឿងសង្ហារិមព្រះខ័នឫទ្ធិ ទើបតែដំណើរការសាកល្បងនាំយកតុរូបរាង iPhone ដ៏ប្លែកនេះមកលក់ស្រុកខ្មែរបានប៉ុន្មានថ្ងៃប៉ុណ្ណោះ។លោក សុខ ជោតិសាឫទ្ធិ ម្ចាស់ហាងលក់គ្រឿងសង្ហារិមព្រះខ័នឫទ្ធិ បានប្រាប់ពីដំណើរការនាំយកនូវតុ iPhone ពីប្រទេសចិនមកលក់នៅស្រុកខ្មែរនេះថា៖ «កាលដើមឡើយ នៅពេលខ្ញុំ និងបងប្អូនបានទៅលេងនៅប្រទេសចិន បានឃើញតុនេះ ក៏នាំគ្នាទិញមុនពេលវិលមកផ្ទះវិញ ហើយខ្ញុំបានយកតុមួយទៅដាក់តាំងបង្ហាញនៅហាងលក់សង្ហារិមខ្ញុំ និងថតវីដេអូបង្ហោះ នាពេលថ្មីៗនេះ ក៏ស្រាប់តែឃើញមានអតិថិជនច្រើនចាប់អារម្មណ៍ និងបានទូរស័ព្ទមកសួរនាំ និងពេលនេះ ពួកគាត់បានកុម្ម៉ង់កក់ទុកជាមុនបានចំនួនជាង ១០ នាក់ហើយផងដែរ ខណៈបងប្អូនខ្លះទៀតរង់ចាំពេលខាងខ្ញុំបាននាំយកតុទាំងនោះមកច្រើនដាក់លក់នៅហាងឲ្យពួកគាត់អាចមើលឃើញច្បាស់នឹងភ្នែកសិន ទើបបានពួកគាត់សម្រេចចិត្តបានថា ត្រូវទិញ ឬអត់?»។
ដោយសាររូបលោក និងបងប្អូនបានយកតុនេះទៅប្រើ និង កត់សម្គាល់ឃើញថា វាមានគុណភាពល្អប្រើ ទើបលោកសម្រេចចិត្តនាំយកតុទាំងនោះមកដាក់លក់។ម្ចាស់ហាងលក់សង្ហារិម រូបនេះបន្តថា៖ «វាជាប្រភេទតុផលិតពីដែកអាលុយមីញ៉ូម នៅផ្នែកខាងលើ និងតួតុធ្វើពីកញ្ចក់ មានទំហំ បណ្តោយ ១០៥ សង់ទីម៉ែត្រ និងទទឹង ៥៣ សង់ទីម៉ែត្រ។ ចំពោះពណ៌ដែកអាលុយមីញ៉ូម ផ្នែកខាងលើវិញ គឺមានច្រើនជម្រើសដូចជាពណ៌ស ពណ៌មាស និងពណ៌ប្រាក់ជាដើម»។
ខណៈពុំទាន់មានការលម្អិតពីសេវាកម្មនៅឡើយ លោក សុខ ជោតិសាឫទ្ធិ បានលើកឡើងថា៖ «សម្រាប់បងប្អូននៅទីក្រុងភ្នំពេញ ប្រសិនចាប់អារម្មណ៍ ហើយចង់កុម្ម៉ង់ទិញមានសេវាកម្មដឹកដល់ផ្ទះនោះ ទាល់តែបងប្អូនជាវចាប់ពី ២ គ្រឿងឡើងទៅ តែបើទិញតែមួយវិញ យើងមិនមានសេវាដឹកជញ្ជូនឲ្យទេ គឺបងប្អូនត្រូវជួយចេញថ្លៃសេវាដឹកជញ្ជូន»៕
Comments
Post a Comment