ការប្រឡងសញ្ញាបត្រមធ្យមសិក្សាទុតិយភូមិ ត្រូវបានបញ្ចប់មួយព្រឹកហើយ ក្នុងនោះ អង្គភាពប្រឆាំងអំពើពុករលួយ បានរាយការណ៍ជាបន្តបន្ទាប់អំពីស្ថានភាពនៃការប្រឡង ហើយក៏មានរឿងដ៏គួរឲ្យកត់សម្គាល់ និងចាប់អារម្មណ៍មួយចំនួនផងដែរ។
១. គ្រូអនុរក្សនៅមណ្ឌលវិទ្យាល័យសិរីសោភ័ណ ខេត្តបន្ទាយមានជ័យ បំបៅទឹកដោះកូន ក្នុងពេលបំពេញភារកិច្ច។
គ្រូអនុរក្សម្នាក់ទៀត នៅមណ្ឌលអនុវិទ្យាល័យបូព្រឹក្ស ខេត្តព្រៃវែង ក៏បានបំបៅទឹកដោះទារកអាយុ ២ខែ ផងដែរ។
២. បេក្ខនារីម្នាក់ ដែលប្រឡងនៅមណ្ឌលវិទ្យាល័យឬស្សីកែវ រាជធានីភ្នំពេញ ត្រូវបានអនុរក្សឲ្យលុបចោលនូវសំណេរឯកសារដែលខ្លួនសរសេរនៅលើជើងរបស់ខ្លួនចេញ។ បន្ទាប់ពីលុបរួច អនុរក្សបានអនុញ្ញាតឲ្យសិស្សស្រីម្នាក់នោះ ចូលប្រឡងធម្មតា។
៣. បេក្ខជនបន្ទប់លេខ ២៨ នៅមណ្ឌលសាលាបឋមសិក្សាវត្តបូព៍ ខេត្តសៀមរាប មានបញ្ហាបូសជើង។ គណៈកម្មាការបានអនុញ្ញាតឲ្យបេក្ខជនរូបនេះចេញមុនបានដើម្បីទៅពេទ្យ។
បេក្ខនារីបន្ទប់លេខ ៧ មណ្ឌលសាលាបឋមសិក្សាវត្តបូព៍ ខេត្តសៀមរាប មានបញ្ហាឈឺក្រពះ អនុរក្សបានរកទឹក និងរបស់ញ៉ាំបន្តិច រួចបេក្ខជនរូបនោះចូលក្នុងបន្ទប់ប្រឡងវិញ។
នៅមណ្ឌលវិទ្យាល័យព្រះសីហនុ ខេត្តកំពង់ចាម ម៉ោង ៩កន្លះ បេក្ខជនម្នាក់ និងអ្នកសង្កេតការណ៍ មានសុខភាពមិនសូវស្រួល។
៤. នាព្រឹកថ្ងៃទី០១ នៃការប្រឡង ក្រសួងអប់រំ បញ្ជាក់ថា ស្ទើរតែគ្មានការនាំចូលនូវសំណៅឯកសារ និងសម្ភារៈហាមឃាត់មកជាប់ខ្លួនរបស់បេក្ខជន។ មានករណីសំណៅឯកសារ និងសម្ភារៈហាមឃាត់មកជាប់ខ្លួនរបស់បេក្ខជនតិចតួចបំផុត៕
Comments
Post a Comment