គួបផ្សំបទពិសោធធ្លាប់មានអាជីពជាអ្នកបកប្រែច្រើនឆ្នាំ នៅឯអង្គការនោះស្រាប់ និងស្រូបបាននូវប្រជាប្រិយភាពពីអាជីពថ្មីជាសិល្បការិនីតាមវិទ្យុ និងតាមបណ្តាញសង្គម នាពេលប៉ុន្មានឆ្នាំចុងក្រោយនេះ ក៏សម្រេចឲ្យអង្គការភ្លេនអន្តរជាតិកម្ពុជា បានប្រកាសជាផ្លូវការទទួលយកបេក្ខភាព ឌីជេ ណាណា ដែលមានឈ្មោះពិតកញ្ញា នាង សុវ៉ាតនា ធ្វើជាតំណាងអគ្គរាជទូតសុច្ឆន្ទៈកិត្តិយសរបស់ខ្លួន។
នៅក្នុងតំណែងជាតំណាងអគ្គរាជទូតសុច្ឆន្ទៈកិត្តិយសរបស់អង្គការភ្លេនអន្តរជាតិកម្ពុជានេះ ដែលបានប្រកាសជាផ្លូវការចាប់ពីថ្ងៃចន្ទ ទី ១៤ ខែសីហា ឆ្នាំ ២០១៧ បន្តរហូតដល់ឆ្នាំ ២០២២ តាមរយៈយុទ្ធនាការ Takeover មានតួនាទីជាអ្នកដឹកនាំជួយពង្រឹងទៅលើផ្នែកសមត្ថភាពរបស់ក្មេងស្រី នៅឯតាមតំបន់ទីជនបទដាច់ស្រយាលនានានៃប្រទេសកម្ពុជា។កញ្ញា នាង សុវ៉ាតនា ហៅឌីជេ ណាណា មានស្រុកកំណើតមកពីខេត្តកំពង់ចាម ហើយមានលោកឪពុកបម្រើការងារជាបុគ្គលិកនៅតាមអង្គការនានាតាំងពីក្មេងវ័យមកនោះ បង្ហើបប្រាប់អំពីដំណើរដើមទងនៃឱកាសបានក្លាយជាតំណាងអគ្គរាជទូតសុច្ឆន្ទៈកិត្តិយសនេះ ។ «តាមពិតទៅបេក្ខភាពនេះ នាងខ្ញុំធ្លាប់ត្រូវបានអង្គការស្នើយូរណាស់មកហើយ ខណៈខ្ញុំក៏ធ្លាប់យល់ព្រមទទួលតាំងពីពេលស្នើដំបូងមកដែរ ទោះបីជាទើបនឹងចេញនូវសេចក្តីប្រកាសផ្លូវការកាលពីថ្ងៃម្សិលមិញក្តី»។កញ្ញា ណាណា បន្តថា៖ «ជាក់ស្តែងមែនទែនទៅ នាងខ្ញុំធ្លាប់បានធ្វើការងារជាមួយនឹងអង្គការភ្លេនអន្តរជាតិកម្ពុជានេះក៏ច្រើនឆ្នាំមកហើយ ខណៈពេលនោះនាងខ្ញុំគ្រាន់តែជាអ្នកបកប្រែតែប៉ុណ្ណោះ តែពេលនេះក្លាយជាតំណាងនាំសារល្អៗ ឬប្រាប់ពីគំរូល្អនានាក្នុងនាមជាអ្នកដឹកនាំឲ្យស្ត្រី ដើម្បីយកទៅចែកជូនដល់ក្រុមក្មេងស្រីនៅតាមទីតំបន់ជនបទបានស្វែងយល់»។
ទោះបីខ្លួននៅលីវ និងពុំមានបទពិសោធជាម្តាយរបស់ក្មេងស្រីៗ ក៏ជាចំណែកមួយសំខាន់ផ្នែកចិត្តសាស្ត្រមើលចិត្តក្មេង សម្រាប់យុទ្ធនាការក្នុងតួនាទីដឹកនាំពង្រឹងសមត្ថភាពក្មេងស្រី របស់អង្គការភ្លេនអន្តរជាតិកម្ពុជានេះ មិនអាចចោទជាបញ្ហា ឬជាឧបសគ្គដល់កញ្ញា នាង សុវ៉ាតនា នោះឡើយ។
ខណៈឌីជេ ណាណា ដែលមានវ័យ ៣០ ឆ្នាំ និងជានិស្សិតបានបញ្ចប់ការសិក្សាផ្នែកទំនាក់ទំនងអន្តរជាតិ នៅសាកលវិទ្យាល័យបញ្ញាសាស្ត្រនោះ បានអះអាងយ៉ាងងាយដូច្នេះថា៖ «ដោយសារនាងខ្ញុំធ្លាប់ធ្វើការជាមួយអង្គការនេះស្រាប់ ហើយក៏ធ្លាប់បានស្វែងយល់អំពីគម្រោងការសំខាន់របស់អង្គការផងដែរ បើទោះបីជាកាលនោះនាងខ្ញុំត្រឹមតែជាអ្នកបកប្រែក្តី។
ម្យ៉ាងវិញទៀត ទោះបីជានាងខ្ញុំនៅលីវ ហើយមិនទាន់បានឆ្លងកាត់ជីវិតគូមានកូនតូចៗមែនក្តី ក៏នាងខ្ញុំធ្លាប់មានបទពិសោធមើលថែទាំក្មួយៗបង្កើត និងប្អូនៗ តាំងពីនៅជាកូនង៉ែតរហូតដល់ធំដែរ ដូច្នេះវាក៏អាចជាបទពិសោធពិតមួយ និងបទពិសោធខ្លួនឯងកាលនៅពីក្មេងរស់នៅជាមួយនឹងឪពុកម្តាយទៀតផងដែរ។ ទាំងអស់នេះ គឺពិតជាអាចយកមកធ្វើជាទុនប្រើប្រាស់នៅក្នុងយុទ្ធនាការនៃគម្រោងរបស់អង្គការភ្លេនអន្តរជាតិកម្ពុជា ដើម្បីចូលរួមជួយពង្រឹងសមត្ថភាពទៅដល់ក្មេងស្រីកម្ពុជាឲ្យបានល្អជាក់ជា មិនខាននោះឡើយ។
Comments
Post a Comment