ចំនួនភ្ញៀវទេសចរចូលទស្សនារមណីយដ្ឋានអង្គរ
នៅតែរក្សាបានកំណើននៅឆមាសទីមួយឆ្នាំនេះ
ទោះបីមានការដំឡើងថ្លៃសំបុត្រជិតពីរដងក៏ដោយ ដែលកំណើននេះបានផ្តល់ចំណូលពីការលក់សំបុត្រចូលអង្គរសរុបជាង
៥២ លានដុល្លារក្នុងរយៈពេល ៦ ខែនេះ។
នេះបើតាមរបាយការណ៍ពីគ្រឹះស្ថានអង្គរចេញផ្សាយកាលពីម្សិលមិញ។
ចំណូលសរុបនៅឆមាសទីមួយឆ្នាំនេះ
បានកើនឡើង ៦៧ ភាគរយ ធៀបនឹងរយៈពេល ដូចគ្នា កាលពីឆ្នាំមុន
ដែលកាលនោះទឹកប្រាក់ពីការលក់សំបុត្រចូលរមណីយដ្ឋានអង្គរមានតែជាង ៣១
លានដុល្លារ ប៉ុណ្ណោះ។
បើតាមតួលេខនេះ ចំណូលនេះគឺស្មើនឹង ៨២
ភាគរយនៃចំណូលមួយឆ្នាំពេញកាលពីឆ្នាំ ២០១៦
ដែលទទួលបានប្រាក់សរុបប្រមាណជា ៦៣,៦ លានដុល្លារប៉ុណ្ណោះ។
តាមរបាយការណ៍ពីគ្រឹះស្ថានអង្គរ
ចំនួនភ្ញៀវទេសចរទិញប័ណ្ណចូលទស្សនាមាន ១,២៣ លាននាក់នៅឆមាសទីមួយឆ្នាំនេះកើនឡើង
១៣ ភាគរយ ក្នុងរយៈពេលដូចគ្នាកាលពីឆ្នាំមុន។
លោកស្រី ចៅ ស៊ុនកិរិយា
អ្នកនាំពាក្យអាជ្ញាធរជាតិអប្សរា
បានលើកឡើងថាលទ្ធផលនៅឆមាសទីមួយឆ្នាំនេះបង្ហាញថា
ការសម្រេចដំឡើងថ្លៃប័ណ្ណចូលទស្សនារមណីយដ្ឋានជិត
ពីរដង
មិនទាន់មានឥទ្ធិពលអវិជ្ជមានណាមួយដល់ចំនួនភ្ញៀវទេសចរនោះទេ
ខណៈដែលចំនួននៅតែកើនឡើងក្នុងអត្រាល្អ។
អ្នកស្រីបានថ្លែងថា៖ «ចំណូលនៅតែកើនឡើងល្អ
ហើយចំនួនភ្ញៀវមកទស្សនាក៏នៅតែកើនឡើង
អ៊ីចឹងដូចជាអត់មានសញ្ញាអីបង្ហាញពីផលអវិជ្ជមាន
[ពីការឡើងថ្លៃប័ណ្ណ]នោះទេ»។
អ្នកស្រីបន្តថា
តែវាដូចជានៅឆាប់ពេកក្នុងការវាយតម្លៃ
ហើយស្នើឲ្យរង់ចាំលទ្ធផលជាក់ស្តែងនៅឆ្នាំ ២០១៧ នេះសិន។
អ្នកស្រីបន្តថា៖ «យើងគួរតែចាំមើលលទ្ធផលមួយឆ្នាំពេញសិន
ហើយបើចំណូលនៅតែកើនល្អ វាជាការល្អមែនទែន [សម្រាប់ចំណូលជាតិ]»។
របាយការណ៍ដដែលឲ្យដឹងទៀតថា
ការលក់សំបុត្រចូលទស្សនារមណីយដ្ឋានអង្គរ នៅខែមិថុនា មានជាង ១៤
ម៉ឺនប័ណ្ណ ធៀបនឹងខែមិថុនា ឆ្នាំ ២០១៦ កើនឡើងជាង ១៧ ភាគរយ
ដោយរកចំណូលសរុបជាង ៦,២
លានដុល្លារ កើនឡើង ៨៩ ភាគរយ។
រដ្ឋាភិបាលតាមរយៈគ្រឹះស្ថានអង្គរបានចាប់ផ្តើមអនុវត្តការដំឡើងថ្លៃប័ណ្ណចូលទស្សនារមណីយដ្ឋានអង្គរចាប់ពីខែ
កុម្ភៈ ឆ្នាំ ២០១៧ ដោយក្នុងនោះតម្លៃប័ណ្ណចូលទស្សនាសម្រាប់រយៈពេល ១
ថ្ងៃបានកើនពី ២០ដុល្លារ ដល់ ៣៧ ដុល្លារ។
តម្លៃសំបុត្រចូលទស្សនារយៈពេលបីថ្ងៃត្រូវឡើងពី
៤០ ដុល្លារទៅ ៦២ ដុល្លារ
និងសំបុត្រសម្រាប់ចូលទស្សនាមួយសប្តាហ៍ត្រូវឡើងថ្លៃពី ៦០ ដុល្លារដល់
៧២ ដុល្លារ។
គ្រឹះស្ថានអង្គរ
មិនបានបញ្ជាក់ពីមូលហេតុលម្អិតនៃការដំឡើងថ្លៃប័ណ្ណនោះទេ
តែបានបញ្ជាក់ថា នឹងដកយក ២ ដុល្លាររាល់សំបុត្រលក់ចេញនីមួយៗ
ដើម្បីបរិច្ចាគដល់មន្ទីរពេទ្យគន្ធបុប្ផា។
តាមរបាយការណ៍ចំណូលបានពីការលក់សំបុត្រគ្រឹះស្ថានអង្គរបានបរិច្ឆាគមួយផ្នែកដល់មន្ទីរពេទ្យគន្ធបុប្ផា
ដែលគិតត្រឹមរយៈពេល៦ខែថវិកាដែលបរិច្ឆាគដល់មន្ទីពេទ្យគន្ធបុប្ផាសរុបជាង
២ លានដុល្លារ។
លោក លូ ម៉េង
សហប្រធានក្រុមការងារទេសចររដ្ឋាភិបាលនិងវិស័យឯកជន ដែលធ្លាប់លើកឡើងជា
ការបារម្ភពីផលអវិជ្ជមានពីការដំឡើងថ្លៃប័ណ្ណ លើកឡើងកាលពីម្សិលមិញថា
ការអនុវត្តតម្លៃប័ណ្ណកើនឡើងចាប់ពីខែកុម្ភៈ
នៅមិនទាន់ប៉ះពាល់ជាអវិជ្ជមានដល់ពាណិជ្ជកម្មក្នុងវិស័យទេសចរណ៍នោះទេ។
លោកបានថ្លែងថា៖ «យើងនៅតែឃើញមានកំណើនភ្ញៀវទេសចរ
ហើយវាជារឿងល្អសម្រាប់យើងធ្វើឲ្យយើងលែងសូវបារម្ភ»៕
Comments
Post a Comment